Тикшерү комитеты Магнитогорскида йорт җимерелүнең сәбәбен ни дип фаразлый?
Күпкатлы йорт җимерелү аркасында корбан булучылар 39 кеше, алар арасында балалар да бар. Бүген аларны җирләү башланды.
Россия Тикшерү комитеты Магнитогорскида торак йортта шартлауны тикшерү турында хисап тотты. Бүген, 4 гыйнварда, хәрабәләрнең бер өлешен карау тәмамланган, диелә комитетның рәсми сайтында.
"Табылган фрагментларда шартлаткыч матдәләр һәм аларның компонентлары табылмады. Җинаять эшен тикшерү дәвам итә", - диелә хәбәрдә.
Тикшерүчеләр шартлаткыч матдәләр табылмавы турында инде икенче тапкыр хисап тота. Теракт версиясе 2 гыйнвар көнне кире кагылды.
Магнитогорскида 10 катлы йорт подъездында шартлау 31 декабрь иртәсендә булды. Коткару операциясе берничә көн барды һәм бүген иртән генә тәмамланды.
Төп версия буенча, шартлауның сәбәбе - көнкүреш газы. 39 кеше һәлак.
Шул ук темага укыгыз: Магнитогорскидагы фаҗига шаһитләре ни сөйли?