Терлек тотканда нәрсәне истә тоту зарур?
Сорауга Татарстан Республикасы Министрлар Кабинеты Баш ветеринария идарәсенең эпизоотиягә каршы эшчәнлек бүлеге җитәкчесе Александр Козлов җавап бирә.
Терлекне бинада тотканда оптималь микроклимат булу зарур. Анда температура да, дымлылык та, һава йөреше, яктылык, һавада газлар һәм микроорганизмнар күләме дә исәпкә алынырга тиеш. Бу параметрлар терлекләр организмында физиологик процессларга, терлекләр сәламәтлегенә йогынты ясый. Аларның үтәлеше өчен яхшы вентиляция тәэмин ителергә, әмма сквозняклар булырга тиеш түгел. Тиреснең вакытында чистартылуы һәм сыйфатлы подстилка һавада газларны киметергә мөмкинлек бирәчәк. Араннарда суга мохтаҗлык булырга тиеш түгел, кышын исә су җылытылырга тиеш. Тышкы абзарлар яхшы чистартылган булу зарур. Көтүлекләр, малны чыгарганчы, чокыр-чакырлар, тигезсезлекләр булмауга тикшерелергә тиеш. Агулы үсемлекләр үсмәвенә инану зарур.
Хөрмәтле укучыларыбыз! Әгәр сезнең белгечләргә, артистларга, журналистларга сорауларыгыз булса, безнең Ватсапка языгыз: +79270379110 Без тиз арада сезнең сорауга җавап табарга тырышырбыз. Теләсә кайсы темага сораулар кабул итәбез.