Татарстанның Чирмешән районында 11 июльгә каршы төндә 15 кеше зыян күргән җитди юл-транспорт һәлакәте булган. Бу хакта ТР буенча Эчке эшләр министрлыгы хәбәр итә.
Хокук саклаучылар мәгълүматлары буенча, Кузайкино – Нурлат трассасында пассажир автобусы йөртүчесе куркынычсыз тизлекне сайламаган, шуның аркасында автобус кюветка очып ауган.
Фото: © ТР буенча Эчке эшләр министрлыгы
15 кеше зыян күргән: өчесен хастаханәгә салганнар, 12сенә урында ярдәм иткәннәр.
Россия Гадәттән тыш хәлләр министрлыгының ТР буенча Баш идарәсе мәгълүматларына караганда, автобуста барлыгы 46 кеше булган, шул исәптән ике бала. Автобус Самара – Яр Чаллы рейсын башкарган. Имгәнүчеләр арасында 15 яшьлек кыз бар.
Татарстан прокуратурасы хәбәр иткәнчә, вакыйга урынына Чирмешән районы прокуроры Илдар Солтанов барган. Авария факты буенча тикшерү башланган. Моннан тыш, әлеге факт буенча куркынычсызлык таләпләренә җавап бирми торган хезмәтләр күрсәтү һәм юл йөрү кагыйдәләрен бозу маддәләре буенча җинаять эше кузгатылган. Тикшерү барышын район прокуратурасы контрольдә тота, диелә хәбәрдә.
Фото: © РФ Гадәттән тыш хәлләр министрлыгының ТР буенча идарәсе