Татарстан батырлары-2026 – район Сабан туйларында кемнәр батыр калды?

Азнакай батыры – Ислам Закиров

20 яшьлек батыр әлеге исемгә икенче тапкыр лаек булган. Ислам тумышы белән Азнакай шәһәреннән, хәзерге вакытта Казанда яши һәм «Зилант» клубында шөгыльләнә. Көрәшче быел Татарстан чемпионатында икенче урынга, Муса Җәлил исемендәге көрәш турнирында беренче урынга лаек булды.

Аксубай батыры – Рөстәм Бикмөхәммәтов

Алабуга батыры – Илнар Галимов

Алабуга районының баш батыры исемен көрәш буенча дөнья чемпионы Илнар Галимов яулаган. Аңа «Lada Grantа» автомобиле тапшырылган. Финалда ул танылган көрәшче Эльдар Хәмитов белән бил алышкан. Илнар Галимов Алабугада спорт мәктәбен җитәкли һәм яшь көрәшчеләр тәрбияли.

Алексеевск батыры – Алексей Абрамов

Алексей Абрамов тумышы белән Алексеевск районыннан. Күп тапкырлар дөнья һәм Россия чемпионы, халыкара класслы спорт остасы.

Апас батыры – Раян Нургалиев

Апас районы Сабан туеның баш батыры булып Чүрибураш авылы егете Раян Нургалиев танылган. «Беренче урынга һәм баш батырга район данын яклап, республикада көрәшеп йөргән спортчылар гына дәгъва кыла алды», – дип яза Апас районының «Йолдыз» газетасы.

Арча батыры – Илшат Фазылҗанов

Арча районы Сабан туеның баш батыры исемен Түбән Мәтәскә егете Илшат Фазылҗанов яулаган. Финалда ул танылган көрәшче Илшат Идиятов белән бил алышкан. Җиңүчегә район башлыгы Алмаз Хисаметдинов тәкә һәм 100 мең сумлык сертификат тапшырган.

Әгерҗе батыры – Ранис Гыйләҗетдинов

Ранис Гыйләҗетдинов рәсми ярышларда 130+ кг үлчәү авырлыгында Чаллы шәһәре данын яклый. Әгерҗе Сабан туенда баш батырга тәкә һәм мини-трактор бүләк иткәннәр.

Әлки батыры – Николай Захаров

Әтнә батыры – Камил Хаҗиев

Әтнә район Сабан туеның баш батыры исемен Мокшы авылы егете Камил Хаҗиев яулаган.

Балтач батыры – Рәдис Сәмигуллин

Балтач районы Сабан туеныӊ баш батыры булып Нөнәгәрдән авылыннан Рәдис Сәмигуллин танылган. Ул Сабан туенда өченче мәртәбә баш батыр булып калган.

Балык Бистәсе батыры – Илсаф Ишмөхәммәтов

Баулы батыры – Илмир Сабиров

Илмир Сабиров район Сабан туеның баш батыры исеменә икенче ел рәттән лаек булган. Җиңүеннән соң ул башка ярышларда катнашмаячагын белдергән.

Биектау батыры – Өлфәт Ибраһимов

Районның баш батыры Өлфәт Ибраһимовка үзенчәлекле бүләк – ат һәм тәкә бүләк иткәннәр. Өлфәт әлеге исемгә беренче тапкыр лаек булган.

Буа батыры – Марат Миначев

Марат Миначев Буа районы Сабан туеның баш батыры исемен сигезенче тапкыр яулаган. Тумышы белән ул Иске Тинчәле авылыннан, рәсми ярышларда 130 кг үлчәү авырлыгында Казан шәһәренең «Зилант» клубы өчен бил алыша.

Зәй батыры – Радик Сәлахов

Күп тапкырлар дөнья һәм Россия чемпионы Радик Сәлахов әлеге исемгә 11 нче мәртәбә лаек булган. Радик тумышы белән Зәй районы Сармашбаш авылыннан. Финалда ул энесе Рөстәм белән бил алышкан. Баш батырга традицион бүләк – тәкә һәм автомобиль бүләк иткәннәр. Бу Радикның карьерасында 20 нче машинасы.

Кайбыч батыры – Азат Габдрәшитов

Кайбыч районының баш батыры исеменә Чаллы көрәшчесе Азат Габдрәшитов лаек булган. Аңа традицион бүләк тәкә, телевизор һәм мини-трактор тапшырганнар. Азат 2025 елда Чаллы Сабан туеның баш батыры исемен яулаган иде. Ул көрәш буенча дөнья һәм Россия чемпионы, рәсми ярышларда Чаллы командасы өчен чыгыш ясый, тумышы белән Актаныш районыннан.

Кама Тамагы районы батыры – Алмаз Гыйләҗев

Батыр әлеге исемгә дүртенче тапкыр лаек булган. Аңа тәкә һәм акчалата бүләк тапшырылган.

Кукмара батыры – Рөстәм Газизуллин

Кукмара районы Сабан туеның баш батыры исеменә Зур Кукмара авылыннан Рөстәм Газизуллин лаек булган. Аңа тәкә һәм төп бүләк – «Lada Grantа» автомобиле тапшырылган.

Лаеш батыры – Муса Галләмов

Муса Галләмов әлеге исемгә бишенче тапкыр лаек булган. Аңа бүләккә «Нива» машинасы тапшырганнар. Муса Галләмов татар көрәшендә иң титуллы спортчыларның берсе. Ул 130+ килограмм үлчәү авырлыгында көрәшә, рәсми ярышларда Лаеш районы командасы өчен чыгыш ясый.

Лениногорск батыры – Абдулла Казыйханов

Абдулла Казыйханов баш батыр исеменә икенче ел рәттән лаек булган. 25 яшьлек батыр тумышы белән Лениногорск районыннан, көрәш белән биредәге спорт мәктәбендә шөгыльләнгән.

Мамадыш батыры – Илмир Ахунҗанов

Илмир Ахунҗанов район Сабан туеның баш батыры исеменә алтынчы ел рәттән ирешкән.

Менделеевск батыры – Ренас Кәлимуллин

Ренас Кәлимуллин татар көрәшендә иң титуллы көрәшчеләрнең берсе. Ул алты тапкыр Россия һәм биш тапкыр дөнья чемпионы. Менделеевск районы Камай авылында туган, хәзер ярышларда Казанның «Зилант» клубы өчен чыгыш ясый һәм шунда ук тренерлык эшчәнлеген алып бара.

Минзәлә батыры – Ришат Гайнетдинов

Мөслим батыры – Наил Хәлиуллин

Нурлат батыры – Алмаз Мостафин

Алмаз Мостафин әлеге исемгә 20 ел килгән. Аңа бүләккә тәкә һәм зур телевизор тапшырганнар.

Питрәч батыры – Ринат Дәүләтшин

Ринат Дәүләтшин рәсми ярышларда 130 кг үлчәү авырлыгында көрәшә, Лаеш районында яши. Батырга бүләккә тәкә һәм «Lada Grantа» автомобиле тапшырылган.

Саба батыры – Фәнзил Нуриев

Фәнзил Нуриев тумышы белән Саба районы Иләбәр авылыннан. Бу аның район Сабан туенда беренче җиңүе.

Сарман батыры – Айнур Корбыев

Сарман районы Сабан туеның баш батыры булып Дүсем авылыннан Айнур Корбыев танылган. Җиңүчегә бүләккә тәкә һәм телевизор тапшырганнар.

Теләче батыры – Раил Нургалиев

Раил Нургалиев – милли көрәш буенча атказанган спорт остасы, күп тапкырлар Россия һәм дөнья чемпионы. 2025 елдан рәсми ярышларда катнашмый, Сабан туйларда гына бил алыша. Батыр тумышы белән Теләче районы Олы Кибәхуҗа авылыннан. Ул үзенә бирелгән бүләкне махсус хәрби операциядә булган якташларына тапшырган.

Тукай районы батыры – Илгиз Дәүләтгәрәев

Илгиз Дәүләтгәрәев 22 яшендә икенче тапкыр районның баш батыр исеменә лаек булган. Аңа тәкә һәм автомобиль тапшырылган. Бу район тарихында милли көрәш җиңүчесенә мондый зур приз бирүнең беренче очрагы булган.

Түбән Кама батыры – Вадим Демидов

Җиңүче «Lada Grantа» автомобиле һәм тәкә хуҗасы булган. Машина ачкычларын аңа Түбән Кама районы башлыгы Радмир Беляев тапшырган. Вадим Демидов 12 яшьтән бирле көрәш белән шөгыльләнә. Ул — районның өч тапкыр абсолют батыры Федот Демидовның оныгы. Финалда ул көрәш буенча спорт мастеры, 2021нче елгы Сабантуй батыры, Шәңгәлче авылыннан Наил Зәйнуллин белән очрашкан.

Тәтеш батыры – Әюп Сөләйманов

Чирмешән батыры – Марат Кәримов

Баш батырга тәкә һәм квадроцикл бүләк иткәннәр. Марат Кәримов тумышы белән Әлмәт районыннан, Чирмешәндә баш батыр исеменә алтынчы тапкыр лаек булган.

Чистай батыры – Турал Азимов

Турал Азимов Төмән шәһәрендә яши, әмма зур ярышларда Чистай районы командасы өчен көрәшә. Көрәшче Чистай Сабан туеның баш батыры исемен 2022 елда да яулаган булган.

Чүпрәле батыры – Раил Камалов

Югары Ослан батыры – Рәмис Төхвәтуллин

Район Сабан туеның баш батырына тәкә һәм телевизор тапшырганнар.

Ютазы батыры – Хәмит Миңнуллин

Яшел Үзән батыры – Ранис Гыйләҗетдинов

Яшел Үзәндә шулай ук Чаллы көрәшчесе Ранис Гыйләҗетдинов баш батыр исемен яулаган. Аңа тәкә «Lada Grantа» автомобиле бүләк иткәннәр.

Яңа Чишмә батыры – Булат Мусин

Булат Мусин – көрәш һәм билбаулы көрәш буенча күп тапкырлар Татарстан, Россия һәм дөнья чемпионы, Дөнья Кубогы иясе. Муса Җәлил истәлегенә багышланган көрәш турниры җиңүчесе. Яңа Чишмә районы Чертуш авылында туган, күп тапкырлар район Сабан туеның баш батыры булып танылган.