Татар телендә җырлаучы рус кызы Анастасия Макарова тормышындагы зур үзгәрешләр хакында яза. Җырчы сөйгәне белән язылышкан. Шунысы да кызыклы – тантанага кунаклар чакырмаганнар, кияү белән кәләш икесе генә барып, язылышып кайткан.
Туй мәҗлесе уздыру да планлаштырыла. «Туй соңрак булачак. Әмма бу язылышу йөрәкләребезне бергә бәйләде. Бу көн – зур тарих башы», – дип яза артист үзенең сәхифәсендә.
Кияү егете Булат исемле. Сүз уңаеннан, моннан 2 ел элек «Интертат»ка әңгәмәдә Анастасия үзенең татар егетенә кияүгә чыгарга теләве турында сөйләгән булган. «Мин хәтта бәлеш тә пешерә беләм, барлык әниләр дә минем кебек киленгә шат булыр иде, дип уйлыйм», – дигән ул.
Яшьләрне чын күңелдән котлыйбыз!
