Танылган фермер Морат Сираҗин вафат
Танылган татар фермеры Морат Сираҗин 12 ноябрьдә 64 нче яшендә бакыйлыкка күчкән. Бу хакта «Вконтакте» социаль челтәрендә үз битендә кызы Индира Сираҗина язган.
«Киң күңелле, оптимист кеше идең. Һәрчак тырышып эшләдең. „Мин оҗмахта яшим, монда бөтен җаным ял итә“ дияргә ярата идең. Хәзер инде тәнең белән ял итәр вакыт җиткән. Нәрсәдер ошамаган булса, гафу ит… Яратабыз сине…» — дип язган кызы әтисе турында.
Морат Сираҗин «Татар-информ» агентлыгы хәбәрчесенә «татар кәҗә сөте эчәргә тиеш» дип сөйләгән иде.
Шулай ук, Морат Сираҗин хуҗалыгына соңгы өч көндә икенче тапкыр һөҗүм ясалып, дуңгызлары атып үтерелгәнен дә язган идек.
Морат Сираҗин (Мурат Сиразин) 1957 елның 19 гыйнварында дөньяга килгән.
