Таиланд тарихында беренче тапкыр уздырылган Сабан туенда төрле милләт вәкилләре милли уеннарда көч сынашкан, татарча җырлар тыңлаган, рәхәтләнеп күңел ачкан.
Сабантуй Пхукет утравындагы Халыкара мәктәп ишегалдында үткән. Бу хакта «Татар-информ» хәбәрчесенә Пхукеттагы «Рассвет» рус мәктәбе җитәкчесе, милли бәйрәмнең оештыручысы Камилла Медярова хәбәр итте.
Таиландта яшәп иҗат итүче Башкортстан җырчысы Рамил Медяров «Бәхилләшү җырын» башкарган, «Катюша» рус бию академиясе укучылары милли биюләр башкарган. Сабантуй мәйданында бурят җырчысы Мария Осипова варганда уйнап күрсәткән.
Милли бәйрәмдә капчык киеп йөгерү, җәядән ату, аркан тартышу кебек ярышлар уздырылган. Ә бүрәнәдәге капчык бәрешендә салам урынына бамбук тутырылган капчыклар белән бәрешкәннәр.
Сабан туенда Пхукетның аш-су осталары татарлар, көнчыгыш халыкларның милли ризыкларын пешереп тәкъдим иткән. Бәйрәмгә килүчеләр өчпочмак, чәк-чәк, кош теле кебек тансык ризыкларны чират торып алып бетергән.
- Сабан туе турында туларак язманы «Татар-информ» сайтында укыгыз.