Исән булса, Чувашиянең татар милли-мәдәни автономиясе рәисе Фәрит Гыйбатдиновка быел 62 яшь тулган булыр иде. Аның өчен беренче чиратта — гаилә, аннары туган авылы — кендек каны тамган Урмае, Чувашия татарлары һәм сөйгән милләте — татар халкы булды.

Шушы көннәрдә туган ягында Татарстанның һәм Чувашиянең атказанган мәдәният хезмәткәре, Чувашия татар милли-мәдәни мохтарияте җитәкчесе Фәрит Гыйбатдиновка багышланган чаралар узды. Чабаксарда «Гыйбатдинов укулары» конференциясе үткәрелде, Фәрит абый истәлегенә ике мемориаль такта ачылды, Корбан ашы уздырылды.