Төркмәнстан Президенты Гурбангулы Бердымөхәммәтов эшеннән китә
2007 елдан бирле Төркмәнстанны җитәкләгән Гурбангулы Бердымөхәммәтов хакимиятне яшьләр кулына тапшыру максатыннан, президентлыктан китәргә җыенуы турында игълан иткән.
«Төркмәнстан Президенты Гурбангулы Бердымөхәммәтов президентлыктан китеп, төркмән парламентының югары палатасы — Халык Мәсләхәте рәисе вазифасына күчергә теләвен белдерде», — дип хәбәр итә «Российская газета».
Үзенең карарын Бердымөхәммәтов «яшь җитәкчеләргә юл бирергә» теләве, дип аңлаткан.
«Мин илебез үсешенең яңа этабында дәүләт идарәсенә юлны рухи мохиттә һәм заманның югары таләпләре нигезендә тәрбияләнгән яшь җитәкчеләргә бирергә кирәк дигән фикерне хуплыйм. Үземнең зур сәяси һәм тормыш тәҗрибәмне, Халык Мәсләхәте рәисе буларак, алга таба бу өлкәдә кулланырга ниятлим», — дигән Президент.
Бердымөхәммәтов Үзәк сайлау комиссиясенә чираттан тыш президент сайлаулары уздыру өчен әзерләнергә боерган. Сайлаулар 12 мартка планлаштырылган.