Винарис Ильегет иң кадерле кешесен югалткан

Җырчы әнисе вафат булуы турында хәбәр итә.

Җырчы Винарис Ильегет Инстаграм битендә кайгылы хәбәр белән уртаклашты. Озак авырудан соң җырчының әнисе вафат булган.

«Ул китте… Минем бәгърем, алтыным, кадерлем. Сызылып таң атканда, табигать уянганда, тормышымның кояшы сүнде… Әнием, җаным минем, ничекләр яшим мин синсез, кояшсыз? Син безнең иң кадерле кешебез, Изге Маһирә! Дусларың, якыннарың сине нәкъ шулай атый иде! Бу чыннан да шулай! Син чын мәгънәсендә изге идең! Балаларың өчен дә, дуслар-туганнарың өчен дә! Син безнең күңелдә мәңге исән! Соңгы сулышыма кадәр минем йөрәгем сине сагынып тибәчәк! Урының җәннәт түрендә булсын, бәгърем! Рәнҗеп китмә. Тыныч йокла!» — дип үзәкөзгеч сүзләр язган җырчы.

«Татар-информ» агентлыгы Винарис Ильегетнең олы кайгысын уртаклаша. Җырчы соңгы әңгәмәдә әнисе турында сөйләгән иде.