Бүген Элвин Грей (Радик Юлъякшин) хатыны Инзилә (кыз фамилиясе Фәтхетдинова) белән гаилә коруларына 2 ел тулуны билгеләп үтә. Радик үзе бу көннәрдә Тобольскида госторольләрдә, ә хатыны аны өендә көтә. Радик иртән тормыш иптәшенә матур букет китерткән һәм социаль челтәрдә туйларыннан кыска видео урнаштырган.
Видеода күренгәнчә, туй бик затлы узган. Анда Башкортстан Республикасы Башлыгы Радий Хәбиров һәм татар эстрадасындагы бик күп кенә йолдызлар катнашкан. Видеода аларның котлауларыннан кайбер җөмләләр китерелә.
Туйда катнашкан җырчылар арасында Салаватның котлау сүзләре игътибарны җәлеп итә. «Хәтта хатыныңның фамилиясен алсаң да югалмаячаксың», – дип әйткән булган аңа бу көнне Салават.