Рөстәм Миңнехановның «Алтын битлеге» Камал театрына тапшырылды - фойеда күреп булачак

Камал театрында «Әлдермештән Әлмәндәр» спектакле премьерасы алдыннан Рөстәм Миңнехановның «Алтын битлек» бүләге театрга тапшырылды.

Спектакль алдыннан Татарстанның халык артисты Фәнис Җиһанша тамашачыга Татарстандагы «Алтын битлек» премиясе лауреатлары турында мәгълүмат бирде дә: «Һичшиксез, безнең республика җитәкчелеге театр сәнгатенә һәр яклап ярдәм итмәсә бу җиңүләр булмас иде. Татарстан Республикасы Рәисе Рөстәм Миңнеханов үзенең «Алтын битлеген» Камал театрына тапшыру турында карар кабул итте. Без бу битлекне фойеның нәкъ уртасына чыгарып куячакбыз. Сез тәнәфес вакытларында әлеге битлек белән якыннанрак таныша алырсыз һәм фотога да төшә аласыз», – диде.

«Бу җиңүләр, безнең югары үрләр яулаулар – алар барысы да коллективның уртак эше. Безнең тамашачыбыз башкалабызда яшәүчеләр генә түгел, килгән кунаклар да. Әлеге бүләкләр һәм җиңүләр белән Татарстан һәм Россия театр сәнгатен баетырга сезнең алда сүз бирәбез һәм без бу сүзебезне тотачакбыз», – дип тәмамланды ул сүзен.

Кичә театрда «Әлдермештән Әлмәндәр спектакле беренче тамашачыларга күрсәтелде. Тамашачылар арасында Татарстан Дәүләт Советының мактаулы рәисе Фәрит Мөхәммәтшин, Татарстан Республикасы Дәүләт Советы Рәисе вазифаларын башкаручы Марат Әхмәтов, Татарстан Республикасы Рәисе Аппараты җитәкчесе Әсгать Сәфәров, Татарстан мәдәният министры Ирада Әюпова, Казан шәһәре башлыгы урынбасары Гүзәл Сәгыйтова һәм башка дәрәҗәле кунаклар бар иде.

• 2024–2025 елгы сезон йомгаклары буенча Рөстәм Нургали улына «Россия театр сәнгатенә ярдәм күрсәткәне өчен» «Алтын битлек» премиясе тапшырылган иде.
• Бу инде театрда сакланучы дүртенче «Алтын битлек». Тамашачылар шулай ук театрда Россия һәм Татарстанның халык артисты Ринат Таҗетдиновның («Театр сәнгатен үстерүгә керткән өлеше өчен») һәм «Болганчык еллар. Мөһаҗирләр» спектакленең («Иң яхшы спектакль. Драма театры», «Иң яхшы костюмнар буенча рәссам эше») «Алтын битлек»ләрен дә күрә ала.