Ришат Төхвәтуллин Элвин Грейның туенда кияү чәчәге тоткан
Парлы мәҗлесләргә Алия Карачурина белән бергәләп йөрсәләр дә, Ришат инстаграмда Алия белән бергә булуын күрсәтми.
Җырчы Ришат Төхвәтуллин Элвин Грейның туенда кияү чәчәге тоткан. Әллә никадәр буйдак егет арасыннан Ришат сикереп диярлек, чәчәкне тотып ала, әллә бик каты өйләнәсе килә инде.
Иң кызыгы — бу мизгелләрне үзенең сторисына Ришат түгел, ә Алия Карачурина урнаштырган. Билгеле булганча, Ришат Төхвәтуллин белән Алия Карачурина барлык парлы мәҗлесләргә дә бергә йөриләр. Күптән түгел аларны Әнвәр Нургалиевның хатыны Иринаның туган көнендә бергә күргән идек. Элвин Грей белән Инзиләнең Уфада узган туена да алар бергәләп килгәннәр. Һәрвакыттагыча, туйда Ришатның да, Алиянең дә булуы башка артистларның сторисларыннан күренә. Ришат Алиянең сторисларында да күренгәләп китә, ә менә үзе Алия белән бер генә фото, видео да урнаштырмый.
Алия Карачуринадан Ришат белән мөнәсәбәтләре турында сорагач, ул серле генә итеп: «Ул хакта Ришаттан сорагыз», — дип җавап биргән иде.
Инстадуслары исә һаман яшьләрнең туй көннәрен күрергә өметләнә. «Ришат, Алия белән сезнең туйны көтәбез», «Алия, күлмәгең бик матур. Хәзер сезнең чират инде», -дип комментарийлар калдырганнар.