Популяр алып баручы, җырлар авторы Ренат Галиәскәр узган елның көзендә сөйгәне Айгөл белән гөрләтеп никах мәҗлесе уздырган иде. Әмма яшь гаилә никахларын рәсмиләштермәгән булган икән. Шушы көннәрдә Ренат сторислары аша Айгөлнең язылышасы килүе, ә ЗАГСта буш даталар булмавы хакында сөйләгән иде.
Хит җырлар авторы кабат ЗАГСка килүләре хакында хәбәр итә. Видеоларны карап, тагын бер яңалык ачылды. Яшь пар тиздән әти-әни булачак икән!
«Хәерле көн, кадерле кунаклар! Җәмәгать, өченче тапкыр ЗАГС юлын таптыйбыз, әмма «Архив көне» дип язылган. Кертерләрме инде?» – дип сөйли ул. Бәхеткә, аларны кабул итәләр, һәм яшь гаилә язылышып чыга.
«Җәмәгать, ниһаять, сезнең тырышлык һәм безнең тырышлык белән, паспортларга мөһер куелды. Без хәзер – рәсми рәвештә законлы ир белән хатын. Һәр кешегә дә үз бәхетен табып, бәхетле яшәргә язсын», – дип сөйли сөйкемле хатыны белән басып торган Ренат.
«Иң мөһиме – пенсия алдыннан булмаган», «Мәңге онытылмаслык ЗАГС маҗаралары», «Әле кем ЗАГСка өч тапкыр йөри», «Ниһаять», «Килен – бигрәк сөйкемле сабый» дип комментарийлар һәм күпсанлы котлаулар калдырганнар.
Фото: © Видеодан скриншот