Равил Галиевның сәхнәдән югалуына Резедә Шәрәфиева гаепле?

Равил Галиев соңгы арада сәхнәдән, эстрададан читләште. Азнакайда узган «Зәйнәбфест»та ул читләшүнең ике сәбәбен әйтте. Берсе Резедә Шәрәфиева белән бәйле икән.

Сәхнәдән югалдым, дип әйтсәм дә бик дөрес түгел инде. Әйе, эстрадада, сәхнәдә элеккеге кебек актив эшләмим. Бу – Резедә Шәрәфиеваның Чаллыдан Казанга китүе белән дә бәйледер. Чөнки ул Чаллыда яшәгәндә, без эстрадада бик актив эшләдек. Иҗатлар ул вакытта гөрләп тора иде. Аның китүе, араларның ерагаюы да сәбәпче булгандыр.

Резедә белән эшчәнлегебезне яңартып җибәрергә дип сөйләштек. Казанда бер режиссер егет яңа концерт программасына сценарий төзеп ята. Тамашачы безне яңа программа белән сәхнәдә тагын күрәчәк әле. Яңа җырлар булачак. Ике җыр «табадан төшәргә» тора. Гөлназ Закирова бик матур гына бер җыр язып бирде. Тагын берсе – Чаллының бер үзешчән композиторның җыры. Алла теләсә, тамашачы яңа җырларымны да ишетер.

Аннары минем бик мәшәкатьле еллар булды – йорт салдым. Аңа да байтак көч кирәк. Дүрт-биш ел эчендә өй башлап, өй салып, инде ике ел шунда яшибез. Мин хәзер – Тукай районы Әҗмәкәй авылы кешесе, – дип сөйләде Равил Галиев.