Раил Нургалиевның 38нче машинасын алу шатлыгы: «Энҗеле көрәш» яңа чыгарылыш тәкъдим итә
Татарның милли спорт төре көрәшне кызлар күзлегеннән күрсәтүче «Энҗеле көрәш» проекты яңа чыгарылышын тәкъдим итә. Әлеге чыгарылыш – Әстерхан өлкәсе Җәмәле авылында үткән Бөтенроссия Авыл Сабан туеннан. Проектның авторы Энҗе Габдуллина «Интертат» өчен Җәмәле Сабан туеннан репортаж да тәкъдим иткән иде.
«Энҗеле көрәш» видеоблогына Бөтенроссия Сабан туендагы көрәш мизгелләре кергән. Чыгарылышта абсолют батыр өчен көрәшкә бары авырлыклары 100 кг нан югары булган көрәшчеләрне генә кертү, Шыгырдан егетләреннән казы, 20 яшькә хәтле генә көрәшеп, аннары өйләнергә уйлаган мишәр малае, абсолют батыр калган Раил Нургалиевның 38нче машинасын оту шатлыгы, күтәреп булмаслык авыр тәкә, Раил өчен «Радик» дип кычкырып җанаткан, хәтта «салып бирергә» дә әзер булган Әстерхан абыйларын күрергә була.