Рөстәм Нәбиев татарча шигырь сөйли
Җырчы Данир Сабиров Инстаграм аккаунтында концертта Рөстәм Нәбиевнең татарча шигырь сөйләгән видеосын урнаштырган.
«Брат, горурланам синең белән! Син — легенда!» — дип язып куйган. Комментарийларда ул шигырьнең авторы әнисенең сеңлесе булуын әйткән.
Концертта халык аягүрә алкышлый. «Бөтен кеше синнән көч ала, син Аллаһы Тәгалә тарафыннан яратылган изге җан диләр», — дигән комментарийлар язганнар.
Яратканга бирәм сынауларның,
Күп өлешен дигән бер Алла.
Шул бәндәнең берсе миндер диеп,
Туктап тормыйм, барам мин алга.
Рәхмәтлемен шушы язмышыма,
Канәгатьмен шушы тормыштан.
Дүрт саннары төгәл кайберәүләр
Гел әзерне көтә язмыштан.
Авырлыклар килгән икән сиңа,
Сыгылсаң да, рухың сынмасын.
Тормыш җырын башлагансың икән,
Башкалар да сиңа кушылсын.
Мин бәхетле, әгәр җылы сүзем,
Дәва икән башка берәүгә.
Мин бәхетле, әгәр минем үрнәк,
Дәрт-көч бирсә сезгә яшәргә.