Рәфинә Ганиуллинага ТМТВдан соң “Бакча карачкысы” дигән бәяләмә әйткәннәр
Җырчы белән “Болгар радиосы”ның “Пирамида” концертлар залында үткән тамашасында сөйләштек.
-Рәфинә, сез ТМТВ премиясендә шундый матур образда чыккан идегез, мин сезне аристократкаларга охшаттым. Концерттан соң образыгызга бәйле фикерләр килдеме?
-Төрле бәяләмәләр булды, әйе. Бигрәк тә “бакча карачкысы” дигәне истә калды. Кем генә юк, нинди генә фикерләр ишетмәссең. Мин инде үземчә сәхнәгә бакча карачкысы буларак чыкмаган идем. Бу минем шундый җыелма образ иде. “Исемсез хат” дигән җырым үткәннәргә барып тоташа. Сүз бәлки югалган, вакытлар аша, гасырлар аша килеп җитә алмаган хат турында барадыр. Билгесезлек, шуңа күрә мин үземне шундый образда тәкъдим иттем инде.
-Рәфинә, сез бәби көтәсез һәм шундый актив режимда эшлисез. Туганнарыгыз моңа ничек карый?
-Төрлесе бар, “туктап торсаң да була инде, бүтән җырлама” дип әйтүчеләр дә бар. Шундый актив яшәү рәвешенә ияләшкәнгә күрә, миңа өйдә генә утыру авыр бирелә. Болай кеше арасында онытылып эшләгәндә ничектер рәхәтрәк. Бәби белән очрашуга кадәр вакыт җиңелрәк үткән сыман.
-Исемнәрне уйлап куйдыгызмы әле?
-Уйладык, әлбәттә. Мин катлаулырак исемнәр яратам. Үзебезчә, татарча булуы безнең өчен бик мөһим, - диде Рәфинә Ганиуллина.