Пакистанда пассажир автобусы тарлавыкка төшеп киткән, кимендә 20 кеше һәлак булган, тагын 20ләп кеше яраланган. Бу хакта «Geo TV» телеканалына сылтама белән РИА Новости яза.
Полиция мәгълүматлары буенча, автобус Равалпиндидан Гилгитка барган, ә авария иртәнге 5:30 сәгатьтә була. Полиция вәкиле сөйләгәнчә, авария Чилас шәһәреннән 20 километр ераклыкта булган. Якынча мәгълүматлар буенча, автобус югары тизлек аркасында тарлавыкка төшеп киткән.
Полиция комиссары урынбасары Файаз Ахмед хәбәр иткәнчә, яраланган пассажирларның кимендә бишесенең хәле җитди булып санала.
«Һәлакәт урынында коткару операциясе төгәлләнде, анда армия вертолетлары да катнашты», – дигән ул. Пакыстан премьер-министры Шахбаз Шариф һәлак булганнарның гаиләләренең кайгысын уртаклашты.
Шулай ук премьер хакимиятләргә зыян күргән кешеләргә мөмкин булган медицина ярдәмен тулысынча күрсәтергә боерды.
