Илнат Фәрхуллин, бик каты пешеп, хастаханәдә дәвалана. Җырчы үзенең хәлләре турында язулучыларына даими сөйләп тора.
«Алга таба, әкрен генә атлыйбыз, Аллаһка шөкер. Авыртуны баса торган уколлар инде кадатмыйм. Иртәнге 6.00 сәгатьтән төнге 00.00 сәгатькә кадәр системалар. Уколлар күп.
Палатада үзем генә, кеше белән ята да алмас идем, чөнки ярымшәрә ятарга туры килә. Волдыри (су җыелган шешләр), әкренләп тишеләләр, тән кибә башлады. Бүгеннән сырганак мае сөртә башларга куштылар, яра тирән булган урыннарга фурацилин сөртәм.
Барыгызның да киңәшләрен укып барам, дөрестән дә, җиңел әйбер түгел, шулай язгандыр инде. Моны гына җиңеп чыгарбыз, Аллаһы боерса. Төрле комментарийлар килә. Кайберләрен аңлап бетермим. Кемдер «пиар өчен» ди, кемдер «исерек булгансың» ди, кемдер намазга басарга өнди… Пиар өчен кеше өстенә кайнап чыккан су түкми инде. Бу– очраклы гына килеп чыкты. Һәр кешенең үз фикере, дөрес дип тапсалар, язсыннар.
Минем өчен борчылучылар бик күп. Кайгырмагыз, барысы да яхшы булачак. Минем белән булганыгыз өчен рәхмәт! Яратам сезне», – ди артист.
«Көчле рухлы кешеләрнең тормыш сынаулары да күбрәк була. Аллаһ ярдәм бирсен»;
«Исән-сау бул, Илнат. Тел – сөйләр өчен, ялыккач туктарлар»;
«Син – көчле, тәрбияле егет! Барысы да яхшы булсын», – дип теләкләр яза аңа «подписчиклары».
«Күзләр тия шул, акыллым. Исән-сау сәламәтләнергә язсын! Хәтеремдә, кояшым чираттагы гастрольләрдән кайткач әнинең итәгенә ятты да: «Әни, нигә син мине шундый итеп таптың, бактың», – дип, сабый баладай күз яшьләренә ирек бирде. «Минем дә гади генә эштә эшләп, кичен өйгә кайтасым килә», – диде. Җиңел түгел шул, акыллым, сайлаган хезмәтегез дә. Әмма ничек кенә булмасын, иҗат кешеләре җиргә наз, сөю, матурлык, күңел тынычлыгы алып килә. Син яшь, яшьнәп яшәр чагың. Әниеңә, якыннарыңа терәк егет», – дип язып калдырган аңа Хәния Фәрхинең сеңлесе Фирүзә Ибәтуллина.