«Он сала башласам, табагымны югалтам»: кечкенә Эмилия кызык итеп тәмлүшкәләр пешерә

Социаль челтәрдә әниле-кызлы кызык видеолар таралды. Алар халыкны кызык тавышландырган булуы белән җәлеп итә.

Видеода күренгәнчә, кечкенә кыз Эмилия төрле рецептлар буенча ашарга пешерә, ә әнисе аңа аш бүлмәсендә тулы ирек бирә. Кечкенә пешекче рәхәтләнеп онны идәнгә сыпырып төшерә, камырлы кулларын селки, кефирны табак кырыена сала.

Тавышландыруда «он салыйм дисәм, табакны югалтам», «мин аны шулай селкеп җибәрәм дә, аннары әни мине селкеп җибәрә» дип кабатлана торган сүзләр халыкны бу сәхифәгә кабат-кабат кереп карарга этәрә.

Видеоларны караучылар әни кешенең нык сабыр булуына шакката. Бер видеоны төшергәннән соң, аш бүлмәсен юып чыгарырга кирәклеген һәркем яхшы аңлый.