1 августта 27 яшендә яшь һәм сәләтле табиб, Нурлат район үзәк хастаханәсе терапевты Сиринә Шәяхмәтованың гомере фаҗигале рәвештә өзелгән. Татарстан Сәламәтлек саклау министрлыгы, Нурлат район хастаханәсе коллективы туганнарының һәм якыннарының тирән кайгысын уртаклаша. Бу турыда ведомствоның ВКонтактедагы сәхифәсендә хәбәр ителә.
Участок табиб-терапевты вазыйфасында озак эшләмәвенә карамастан, Сиринә Шәяхмәтова пациентларда һәм коллегаларында ярдәмчел, белемле белгеч, югары мораль принциплары булган шат күңелле кеше буларак истә калыр. Ул даими һөнәри камилләшүгә, яңа белемнәр алуга омтылышы белән аерылып торды, ординатураны тәмамлаганнан соң табиб-фтизиатр булып эшләргә планлаштырды, диелә бу хәбәрдә.
- Моңа кадәр Татарстанның Биектау районында поезд астына кереп һәлак булган 27 яшьлек кыз табиб булган, дип хәбәр иткән идек. «Ул Нурлат Үзәк район хастаханәсе терапевты булып эшләгән», – дип әйттеләр «Интертат»ка ТР Сәламәтлек саклау министрлыгы матбугат хезмәтендә.