Әнисе өйдә бикләп калдырып үтергән кыз яшәгән шартларны видеога төшергәннәр
Әнисе өйдә бикләп калдырып үтергән кыз яшәгән шартларны видеога төшергәннәр
Киров шәһәрендә 3 яшьлек кыз - Кристинаны әнисе фатирда бикләп калдырып, ачтан үтергән. Тикшерү комитеты фатирдагы шартларны видеога төшереп алган#. Бу хакта http://vkirove.ru сайты хәбәр итә.
Кызның әнисе - 21 яшьлек Мария кызын җиде көнгә калдырып чыгып китә. Фатирда ашарга һәм эчәргә булмый. Кызның анасы су кранын ябып калдырган дип уйлыйлар. Бала сусызлыктан үлгән.
Бала мәетен аның әбисе - Мариянең әнисе таба. Ул оныгын туган көне белән котларга килгән була, әмма нәкъ шул көнне бала үлгән була.
Тикшерү комитеты видеосыннан аңлашылганча, бу хатын фатирын чүплеккә әйләндергән. Бөтен идәндә чүп, пычрак киемнәр ята, стеналарга рәсемнәр ясалган, обойлар ертык. Мариянең элек тә баласын карамаганы ачыкланган.
Кристинаны җирләр өчен шәһәр кешеләре 18 мең сум акча җыйган. Кызның әбисе шәһәр халкына рәхмәтен белдергән.
Шәһәр халкы Киров буенча эчке эшләр бүлеге начальнигыннан Мариягә бик кырыс җәза бирүне сорый.
