Махсус операциягә киткән җырчы Таһир Асылгәрәй, ниһаять, элемтәгә кергән һәм «ВКонтакте» сәхифәсенә хәрби киемнәрдән төшкән фотосын һәм видеосын урнаштырган. Фото астына ул үзенең «Җаным көтә бәйрәм» җырын да куйган.
Видеода җырчы: «Үземнең барлык тамашачыларымны якынлашып килүче Яңа ел белән тәбрик итәм. Барыбызга да – бәхет, мәхәббәт, иминлек. Монда булган барлык егетләрнең дә исән-имин гаиләләре янына әйләнеп кайтуын телим. Барысы да әйбәт булсын. Без җиңәчәкбез!» – дип сөйләгән ул.
Таһир Асылгәрәйнең сентябрь башында үз теләге белән махсус операциягә китүе турында хәбәр иткән идек.
«Без бик нык борчылабыз, аны сагынабыз. Якын кешең шундый куркыныч урынга киткәндә, барысы да шундый хисләр кичерә торгандыр… Телефон янымда, гел Таһирдан хәбәр көтәм. Сирәк шалтырата. Аның сөйләшергә дә вакыты юк. Дөресен генә әйткәндә, безне тынычландырыр, үзе белән барысы да әйбәт икәнлеген әйтер өчен генә шалтырата», – дип сөйләгән иде аның тормыш иптәше Наилә ханым «Интертат»ка.
Таһир Асылгәрәйнең социаль челтәрләргә чыга алуына дуслары бик сөенгән. «Аллаһка шөкер, исән-сау икән. Күптән хәбәре юк иде», «Сер бирми дустыбыз, елмаеп тора һәрвакыттагыча. Иән-сау, җиңеп кайтырга барыгызга да», «Исән-сау әйләнеп кайтып, хәерле гомерләрдә яшәргә язсын», «Тизрәк әйләнеп кайтыгыз. Сезнең җырлардан башка яшәү бик кыен», – дип яза алар.