Махсус операциядәге Радик Динәхмәтов дусты Равил Галиевны котлап җырлый - видео

Бу көннәрдә үзенең 55 яшьлек юбилеен билгеләп үткән җырчы Равил Галиев үзенең махсус операциядәге дусты Радик Динәхмәтовтан җырлы котлау кабул иткән. Радик Динәхмәтов үзенең котлау сүзләрендә берничә тапкыр «Уфа-Казан юллары» проекты турында искә ала. Ике җырчыны шушы проект дуслаштырган булса кирәк.

«Хөрмәтле, Равил дустым! Сине күркәм юбилеең белән котлыйм. Сиңа сәламәтлек, хәерле озын гомер, гаилә иминлеге телим. Иҗади уңышлар, яңа җырлар, яңа дуэтлар яздырырга язсын.

Берничә ел элек «Уфа-Казан юллары» дип аталган тамашалар белән Татарстан Башкортстан арасын ныгытуга бик күп көч салдың. Тик кызганыч, коточкыч ковид башланды, ул тамашалар тукталды. Бүген махсус хәрби операция бара. Башкортстан, Татарстан батырлары җиңү яулап кайткач, Аллаһы боерса (бу барлык тамашачыларыбызның да зур үтенече) шушы «Уфа- Казан юллары» проектын кире сәхнәгә кайтаруыңны телим. Әле дә син бар әле дөньяда, Равил, синең иҗатың бар. Аллаһы боерса матур концертлар куеп, бергәләп җырлап, ике халыкны тагын да берләштереп, дуслаштырып, гасырлар буенча ике халыкка бергә булып яшәргә язсын», – дип сөйләгән ул һәм дустын котлап, үзенең иң популяр «Әле дә син бар әле дөньяда» җырының кушымтасын башкарган.