Махсус операциядә һәлак Вильнарга: «Хуш, классташым... Сикәлтәле булды язмышың…»

Инде 1 елдан артык социаль челтәрләрдә аклы-каралы фотоларга, үзәк өзгеч хатирәләргә гел юлыгып торабыз. Шундый хатирәләрнең берсен Лилия Шипшова исемле «ВКонтакте» челтәрен кулланучы язып калдырган. Бу көннәрдә махсус операциядә һәлак булучылар исемлегенә аның сыйныфташы, Пермь өлкәсе Октябрь районының Ишим авылы егете Вильнар Мотыйгуллин исеме дә өстәлгән.

«Хуш, классташым!

Соңгы юлга сине озаттык...

Сикәлтәле булды, никтер, язмышың...

Мәңгелеккә безне ташлап киттең.

Батыр булып киттең, классташым...

Вильнар Мотыйгуллин шук, шаян, тиктормас классташыбыз иде. Яхшы укыды, мәктәп тормышында актив катнашты. Аның белән парлашып бик күп биюләр биергә туры килде: татарын да, мари биюен дә...

Кичә мәктәп альбомын алып, шуннан фотоларны карап утырдым. Классташлар группасына җибәрдем. Вильнарны искә алдык.

3 класста укыганда 9 Май бәйрәменә «Катюша» биюен башкарганбыз икән. Без анда Вильнар белән кырыйда торабыз.

Безнең класс бик дус булды. Әле дә очрашуларны көтеп алабыз. 9 класстан соң Арчага укырга чыгып киткәч тә, классташларны сагынып кайта идем. Алар белән хатлар алыша идек. 1 курста кышкы каникулга кайткач, бергәләп фотога да төшкәнбез.

Ә бүген бөтен авылыбыз белән җыелып, Вильнарны соңгы юлга озаттылар. 1,5 айдан өйгә кайтам, дип йөргәндә, сугышта батырларча һәлак булган. Бик авыр. Бигрәк тә әнисенә, хатыны, ике кызына Аллаһ сабырлыклар бирсен.

Урының оҗмахта булсын, Вильнар! Син безнең күңелләрдә шук, шаян малай булып истә калырсың», – дип яза Лилия.