Ләйсән Гыймаева белән Булат Бәйрәмов утын өеп куюлары турында видео төшергән иде. Анда Булат Бәйрәмов гармунда уйнап утыра, ә Ләйсән бии-бии утын өя.
Ә яңа видеода утынны Булатның әнисе өя. Күрәсең, алдагы видеоны күреп, кайнананың йөрәге түзмәгән, авылдан килеп тә җиткән.
«Кайнанадан эләкте», – дип язып куйган җырчы видео астына.
«Гармунда уйнап, матур итеп биетеп, утын өйдерткән булган. Нәрсә, ул биюче генә идемени? И хәчтрүшләр. Шуны да өеп бетермәгәннәр», – дип ачулангандай итә кайнана.
«Әни, вакыт булмады», – ди Булат.
«Вакытың булган бит гармунда уйнап биетергә» дигәненә «ну...» дип акланмакчы була улы әнисенә.
«Сүндер телефоныңны. Бетте. Әйдә, эшлә», – ди Булатка әнисе.
«Әниләр менә шундый, кирәкне бирә», «Кая чапалак, биреп алыгыз икесенә дә», «Апа, җаным, маладис, дөрес сайрыйсың», – дип, комментарийлар калдырган видеоны караучылар.