Күптән түгел кулын сындырган Уфа блогеры Рөстәм Нәбиевнең тагын сәламәтлеге какшаган
Армиядә вакытта, казарма ишелеп, ике аяксыз калган Башкортстан блогеры Рөстәм Нәбиевнең тормышында «кара полоса» башланган. Ул күптән түгел кулын сындырган иде. Хәзер инде иң биек тауларга менүче буларак танылган блогер социаль челтәрдәге сәхифәсендә кабыргасы сынуы турында хәбәр итә.
Аның сүзләренчә, берничә көн буе аның гәүдәсенең ян ягы авыртып йөргән, ул аңа игътибар итеп тормаган, авыртуга түзеп йөргән. Рөстәм авыртуга чыдар хәле калмагач кына хастаханәгә мөрәҗәгать иткән. Табиблар аңа күңелсез хәбәр җиткергән.
«Тикшерү нәтиҗәләре мине шаккатырды», – дип язган Рөстәм Нәбиев.
Ул кулын сындыргач бәхетсезлек очрагы аны уйланырга мәҗбүр итүе, тормышта мөстәкыйль булуның никадәр мөһим икәнлеген аңлавы турында сөйләгән иде.
Рөстәм Нәбиев чираттагы тауны «яулап» кайтканнан соң ял итәргә уйлавы, 2023 елны сәламәтлеген ныгытырга теләве һәм 3 катлаулы операция ясатырга җыенуы турында да хәбәр иткән иде.
