«Кунагыма да кирәкмәгән әйбер чәйнәп язганчы...» – Данир Сабировтан хейтерларына җавап
Данир Сабировның бер концертында махсус операциядән кыска вакытлы ялга кайткан Ленар исемле хәрби, сәхнәгә менеп, биеп күрсәткән иде. Артист исә хәрби егетне: «СВОдан ялга кайткан якташым Ленар! Чын ир-ат! Әз генә тәмәке исе, әз генә спирт исе килә», – дигән сүзләр белән озатты. Данир Сабировның бу сүзләре күп кенә тамашачыларында канәгатьсезлек уятты. Алар җырчыны хәрбиләрдән көлә дип тәнкыйтьләп чыкты.
Пост янындагы комментарийларга Данирның хәтере калган булса кирәк. Артист бүген үзенең хейтерларына җавап сүзе яздырып урнаштырды.
«Хөрмәтле хейтерообразныйларым! Махсус операциядән ялга кайткан якташым белән пост янында-астында бик акыллы фикерләр язган киңәшчеләрем! «Көләсең аңардан», – диючеләр! Монда – чиста юмор! Сезнең юморның «ю» хәрефе дә булмаганга мин гаепле түгел. Мин аңа үз итеп, ирләрчә, «бераз спирт, бераз тәмәке, чын ир-ат исе килә» дип әйттем. Берсе: «Календарь да бирмәдең», – дип язган. Тулы видео түгел, шуны уйлап карадыгызмы? Мин календарьга калган кешеме? Флешкаларымны да бирдем. «Монысы – егетләр белән концертларымны карый торганы, монысы тыңлый торган», – дидем.
Менә сез өйрәтәсез мине. Сез үзегез нинди файдалы эш эшлисез егетләребезгә? Мин кычкырып йөри торган кеше түгел. Кайберәүләр: «Менә егетләребез!» – дип күкрәк кага. Мин андый кеше түгел, мин – икенче планетадан. Ике фонд бар. Казанда – «Золотые руки ангела» һәм Азнакайдагы якташлар фонды. Мин шул ике фондка да, егетләребезнең исән-сау булуын теләп, даими аптечкалар ясап җибәрәм. Медикаментлар, жгутлар, авыртуны баса торган дарулар. Шуңа күрә сез миңа кунагыма да кирәкмәгән әйбер чәйнәп язганчы, хотя бы сагыз чәйнәп, файдалы эш эшли аласыз. Ярдәм итегез егетләребезгә! Хәләл акчагызның бер тамчысын булса да җибәрегез!
Мине аңлаган, иҗатымны яраткан, жанрымны аңлаган тамашачым, сезгә дә шул мөрәҗәгать. Бергәләп ярдәм итик егетләргә! Мин җибәргән кадәр суммалар җыелса – бик әйбәт, арттырсагыз, тагын да әйбәтрәк була. Кешелек дөньясы инде айга да менеп җитте. Тик бер милләт тә талашсыз, төрттерүсез, тырнак астыннан кер эзләмичә яши алмый. Дөнья кызык, яшәү рәхәт, исән-сау булыйк», – дип сөйли Данир һәм видеосының ахырына, егетләргә акча күчерү өчен, махсус куар-код та урнаштырган.