35 градустан да артып киткән эсселәрдән соң бүген кич Казанда давыл булган, дип язган идек. Ул шәһәргә шактый зыян салды. Күрше төбәкләрдә давылдан һәлак булучылар да бар.
Давыл бүген төнлә Татарстанның кайбер районнарыннан да узган. Блогер Тәнзилә Идиятуллина сторисларында Кукмарадагы куркыныч төнне сурәтләп сөйләгән.
«Исән-сау калдыгызмы, дуслар, туганнар? Абау куркыныч булды бүген төнлә. Без беседкада йоклыйбыз, шуңа бөтенесе күренеп тора, дөньяда нәрсәләр майтарылганы. Башта күктә озак итеп елтыр-елтыр килеп торды, Балтач яклап килде инде ул. Бездә ялт иткән аяз төн иде, йолдызлар да бар иде. Берзаманны килеп җитте безгә дә. Менә җил «у-у-у» дип килә. Яшен, давыл чыкты. Кайчан очып китәрбез икән, дип яттым. Дөньяда иң көчле нәрсә – җилдер инде ул, әйеме? Шуның кадәр зур агачларны төбе-тамыры белән куптарып ата алгач. Зерә куркыныч булды, ничә тапкыр килеп яуды. Аллам сакласын. Яшеннәр сукмадымы икән инде берәрсен», – ди Тәнзилә Идиятуллина.