Ком анимациясе остасы Алинә Хәйруллина яңа татарча композицияләрен күрсәтте
Алинә Хәйруллина - Татарстандагы бердәнбер ком анимациясе мәктәбе җитәкчесе, комнан искиткеч фильмнар һәм композицияләр иҗат итүче рәссам.
Чаллыда яшәүче ком анимациясе остасы Алинә Хәйруллина яңа татарча мотивлы композицияләрен күрсәтте. Аларның берсе — «Шәһри Болгар кызлары» җырына анимация. Һади Такташның «Тәүфыйклы песи» шигыренә анимацияне Алинә «Зәңгәр чәчәк» катнаш балалар бакчасында тәрбияләнүче балалар һәм тәрбиячеләр белән берлектә әзерләгән.
Интертат»ка интервьюда Алинә: «Мин бит татар кызы. Үземнең иҗатым аша аз гына булса да халкыбызның гореф-гадәтләрен, милли йолаларын искә төшерергә, динебезгә игътибар бирергә тырышам. Татарстанда ком графикасында эшләүче профессиональ рәссам буларак, республикабызны һәм халкыбызны башкаларга да күрсәтүне үземнең бурычым дип саныйм.
Эчтәлеге мәгънәле булган татарча җырларга ясалган композицияләрем күп. Аларны карап бик күпләр, хәтта башка илләрдә яшәүче татарлар да, рәхмәт сүзләре язалар», — дип сөйләгән иде.
- Ком анимациясе остасы Алинә: «Иҗатым аша гореф-гадәтләребезгә игътибар юнәлтәм»