Кибеттән сатып алынган торт эченнән резина перчатка чыккан
«Перчатка бар, битлек кая», - дип шаярта социаль челтәр кулланучылар.
Кибеттән сатып алынган әйберләр эчендә әледән-әле төрле әйберләр очрап тора. Ташлар, тере суалчаннар, чүп-чар эләккән ризыклар турында социаль челтәрләрдә дә язалар. Бу юлы Чиләбе өлкәсенең Новосинеглазово шәһәрендә яшәүче ир-ат торт эченнән резина перчатка тапкан. «Вести» каналы шул хакта хәбәр итте.
Ир-ат кибеттә торт ала, өйгә алып кайта һәм өлешләргә кисә башлый. Шул чакта бер кисәк эченнән резина әйбер килеп чыга.
Социаль челтәр кулланучылар ир-атның кәефен күтәрергә маташа. «Акция: торт аласыз, бүләккә — перчатка», — дип шаярталар. «Бу — яңа торт», «Битлек кая», диләр.
Әгәр кибеттән алган азык-төлек эчендә чит предметлар тапсагыз, товарны җитештерүчегә дәгъва белдереп, гариза язарга һәм Кулланучы хокукларын яклау буенча күзәтчелек федераль хезмәтенә (Роспотребнадзор) мөрәҗәгать итәргә кирәк, диелә хәбәрдә.