Саба районы Иләбәр авылыннан Рамил Хафизов казларның йөрәк-бүтәкә-эч маеннан тутырылган каз муены рецептын тәкъдим итә. Ул 2022 елны II Бөтенроссия «Каз өмәсе» фестивалендә каз муены тутыру буенча 1нче урынны яулаган.
Кирәк ингредиентлар:
Каз муены тиресе
3 бүтәкә, 4 йөрәк, әз генә эч мае
2 суган, 2 тырнак сарымсак
Дөге
Тоз, борыч, тәмләткечләр
Эш тәртибе:
Йөрәк белән бүтәкәне турыйбыз. Аннары суган, сарымсак, казның эч мае белән бергә иттартыргыч аша чыгарып, фарш ясыйбыз.
Әзер фаршка бүрттерелгән дөге кушабыз. Кара борыч, тоз һәм ит тәмләткече салып болгатабыз. 1 муенга якынча 400 грамм әзер масса кирәк.
Муенны эчке ягы белән әйләндерәбез. Киң башын җеп белән тегеп куябыз һәм кире тышкы ягына әйләндерәбез. Шул «капчык»ка дөге һәм фарш кушылмасын тутырабыз. Икенче башын җеп белән бәйләп куябыз.
Тутырылган муенны фольгага төреп, 50 минут яки 1 сәгать 180-200 градуслы газ мичендә пешерәбез.
Ашларыгыз тәмле булсын!