Казанның Вишневский урамында коточкыч юл-транспорт һәлакәте оештырган таксистның биоматериалында амфетамин һәм марихуана эзләре табылган. Бу хакта «Татар-информ»га ТР буенча Эчке эшләр министрлыгы матбугат хезмәтендә сөйләгәннәр.
«Биоматериалларны тирәнтен тикшерү нәтиҗәсендә амфетамин һәм марихуана эзләре табылды. Хәзерге вакытта административ кулга алу мәсьәләсе хәл ителә», – дип хәбәр иттеләр ведомствода.
Бу экспертиза тыелган матдәләрне куллануның конкрет вакытын билгеләргә мөмкинлек бирми, дип ассызыклана. Машина йөртүче сүзләренчә, ул наркотикларны 1 айдан артык элек кулланган.
Хәбәр ителгәнчә, кичә Вишневский урамында таксист тукталыш янындагы кешеләр төркеменә барып керә. 11 кеше төрле җәрәхәтләр ала.
