«Аллаһы Тәгалә тел ачкычлары бирсен»: кайсы артистларның балалары быел 1 сыйныфка кергән?

Быел бик күп татар эстрадасы артистларының балалары тәүге тапкыр белем иленә аяк баскан. Җырчылар социаль челтәрләргә матур-матур фотолар куя, ул-кызларына үзләренең иң изге теләкләрен юллый.

Иҗади гаилә Лилия Биктимирова һәм Фәдис Ганиевларның уллары Кәрим 1 сыйныфка укырга кергән.

«Әле генә туган иде Кәримебез. Күз ачып йомганчы мәктәпкә керер вакыты җиткән. Аллаһы Тәгалә акылыңны, зиһенеңне бирсен. Изге юллар сиңа, улкаебыз. Без сине яратабыз, барысын да булдырасыңа ышанабыз», – дип яза Лилия Биктимирова. Энесен мәктәпкә озатырга җырчы Гөлназ Асаева да килгән.

Җырчы Артур Салихов улы Самирны беренче тапкыр мәктәпкә илткән.

«Хәзер безнең гаиләдә ике укучы. Самир бу көнне бик көтте», – ди ул социаль челтәрләрдә.

Алинә Сафиуллина да улы Нариманның тәүге тапкыр мәктәп бусагасын атлап кергән куанычлы мизгелләр белән уртаклаша.

«Менә без дә үсеп җиттек. Бәйрәм белән, дуслар, укытучылар, әти-әниләр, балалар. Мәктәп елларыгыз бары матур хатирәләр булып кына исегездә калсын», – дигән ул.

Җырчы Ләйлә һәм Рөстәм Галиевларның кызлары Арина да 1 сыйныфка укырга килгән.

«Әле генә Риана 1 сыйныфка кергән иде. Бүген ул 5 сыйныфка аяк баса. Ә Аришканы 1 сыйныфка озатабыз. Сау-сәламәт булып, авырмыйча укыгыз, кызларым. Аллаһы Тәгалә тел ачкычлары бирсен сезгә», – дип язып фотоларын куйган Ләйлә.

Рамилә һәм Рамил Хәйретдиновларның улы Салават 1 сыйныфка, ә кызлары Әминә 4 сыйныфка бара.

Алинә Даутова да бәйрәм линейкасыннан фотолар белән бүлешә. Ул 1 сыйныфка кызы Сафинаны озаткан. 

Рамил Шәрәпов һәм Рифат Зариповлар гаиләсендә дә бүген истәлекле көн. Рамилнең кызы Линара һәм Рифатның улы Ислам 155 нче гимназиядә бер сыйныфта укыячак, дип язган идек.  

Рәфинә Ганиуллина һәм Рәзил Камаловларның уллары да мәктәпкә китте. 

«Хәерле сәгатьтә. Яңадан мәктәпкә укырга кергән кебек хис итәбез үзебезне. Бик дулкынландыра», – дип яза җырчылар. 

«Традицияне бозмыйча, бер фото. Хәзер укырга апасы белән бергә йөриячәк», – дигән ИлГәрәй, кызының фотосын урнаштырып. Камиләне укырга 149 нчы лицейга биргәннәр. 

Җырчы Иркәнең кызы да чәчәкләр күтәреп, матур бантикларын тагып, тәүге тапкыр 1 сыйныфка аяк баскан. 

Җырчы Асылъярның кызы Нәүбәһар да 1 сыйныфка укырга кергән. Әлеге истәлекле көн фотоларын җырчы сторисларында күрсәтә.

Җырчы Айгөл Хәернасованың улы Рамазан да 1 сыйныфка кергән. Ул Рамилә һәм Рамил Хәертдиновларның уллары Салават белән бергә 18нче татар гимназияседә белем алачак.

Балаларның барысына да саулык-сәламәтлек, уңышлар, гел яхшы билгеләргә генә укуларын теләп калабыз!