Шәрәпҗан белән Рифат Зариповның балалары бер мәктәпкә бара: «Сабырлык укытучыларга!»

Бүген Рамил Шәрәпов белән Рифат Зарипов 155 гимназия ачылышында чыгыш ясадылар. Сәбәбе бик гади – аларның икесенең дә балалары шушы мәктәпкә беренче класска укырга бара. Рифат Зариповның улы, Рамил Шәрәповның кызы 155 нче татар гимназиясендә укыячак. Ике артист та 1 сентябрь – Белем бәйрәмендә чыгыш ясады.

«Укытучы апайларга – уңышлар, укучыларга – тырышлык, әти-әниләргә – сабырлык», – диде Рамил Шәрәпов. 

Шәрәпҗан «Елмай» җырын җырлады, Рифат Зарипов исә «Туганнарга» җырын башкарды. Җырның соңгы куплетын ул «Сабырлык укытучыларга» дип җырлады.

Балалар аларга чәчәкләр бирде. Икесе дә «чәчәк алгач, рәхәт икән!» дип бәяләделәр.

Аларның чыгышыннан соң беренче класс укучылары шигырьләр сөйләде.