Капчык сугышында кулын имгәткән Рамил Шәрәпов хәлен сөйләде: «Турайтып булмый...»

Рамил Шәрәповның Сабан туенда күңелсез хәлгә таруы, капчык белән сугышу уенында катнашып, кулын имгәтүе хакында язган идек. Сторисларында Рамил виртуаль дусларына хәленең әле дә бик үк шәптән булмавын күрсәткән. Артист арты белән басып фотога төшкән, анда җырчының терсәк сөяге аз гына тырпаебрак торганы күренә. 

«Ничек хәлләрең, дип борчылучылар бик күп. Рәхмәт җылы сүзегезгә. Хәлләр әлегә шулайрак. Хастаханәдә көчле «ушиб» диделәр. Пока турайтып булмый. Чыкмаган микән, дип тә уйлыйм», – дип язган Рамил Шәрәпов. 

Юмор остасы, ни булса да, төшенкелеккә бирелеп утырмый. Мәсәлән, кулын имгәтүе Рамилгә Шәрәпҗан образында вайн төшерергә бер сәбәп булган. Вайнның эчтәлегендә Рамил киләсе елның Сабан туенда нинди ярышта катнашачагын да әйткән.  

Кулын яулык белән муенына аскан Шәрәпҗанга хатыны:

Абау, Шәрәпҗан, нәрсә булды?

Нәрсә-нәрсә, капчык сугышында бәреп төшерделәр. Күрсәттеләр Мәскәүнең кайсы якта икәнен.

Хәзер нишлисең инде?

Нишлисең-нишлисең, катыктан акча эзләү ярышында катнашам. Тамагың да тук, акчалы да кайтасың.

Ә  мин нишлим?

Ә син суганнарыңны киендер. Әнә җәй уртасында өшеп утыралар, мескенкәйләрем.