Күл буенда үрдәкләр ашатканда ана белән бала батып үлгән
41 яшьлек хатын 7 яшьлек улын ияртеп күл буена килгән.
Новосибирск шәһәренең Первомайский районында 17 июльдә фаҗига була. Бер хатын-кыз һәм аның 7 яшьлек улы күлдә батып үлә. Бу турыда Новосибирск.Онлайн хәбәр итте.
Фаҗига «Береговое» бакчачылык ширкәтендә килеп чыга. 41 яшьлек хатын үзенең 7 яшьлек улы белән Кара дип аталган күл буена килә.
«1979 елда туган хатын һәм 2012 елда туган малай көндез батып үлә. Алар Новосибирскта яшәүче кешеләр. Мәетләре табылды. Урынга полиция һәм Тикшерү комитеты хезмәткәрләре барды. Тикшерү эшләре дәвам итә», — дип аңлатканнар Эчке эшләр министрлыгының Новосибирск өлкәсе буенча идарәсендә.
Әлеге фаҗига бәхетсезлек очрагы дип бәяләнә. Якынча мәгълүматлар буенча, әнисе белән баласы күл буена килә. Алар үрдәкләр ашатмакчы була. Шул чакта бала суга төшеп китә. Әни кеше улын коткарырга дип суга ташлана. Кызганычка каршы, алар икесе дә батып үлә.
Моңа кадәр Новосибирск өлкәсендә су буенда ял иткәндә бата башлаган кызны коткарганда, әтисе һәм ике абыйсы һәлак була. Алар кыз баланы ярга төртеп чыгара, тик үзләре батып үлә.