Мексикада урланган Россия туристы Марияне азат иткәннәр. Җирле картель аның бөтен әйберләрен, шул исәптән телефонын һәм паспортын да алып калган. Бу хакта «SHOT» Телеграм-каналы яза.
Россиянең Мексикадагы илчелеге җирле полиция белән хәбәрләшкән. Шуннан соң Мексика Генераль прокуратурасының кешеләрне урлауга каршы көрәш бүлеге, турист хатын-кызны азат итү өчен, ярты төн махсус операция уздырган.
«Хәзер Маша полиция участогында, мин аның белән сөйләшеп алдым. Киеп чыгып киткән киеменнән башка бернәрсәсе дә юк, телефоны да, паспорты да, банк карталары да, акчасы да юк. Хәзер аңа куркыныч янамый, дип әйттеләр», – дип сөйләгән Мариянең ире.
23 яшьлек Мария иреннән башка гына Латин Америкасына сәяхәткә китә, 14 март кичендә аны АКШ чиге тирәсендә Мексика картеле туктата. Кыз Мексикада яшәп торган гаилә белән аларның машинасында барган була. Мексика кешеләрен җибәрәләр, ә Мариядән «аларның җирендә йөргән өчен» акча таләп итәләр.
Картель, Мариянең ире «выкуп» өчен 2,4 мең доллар җибәрсен, дигән шарт куйган.