23 яшьлек Мария Ригович элек Мәскәүдә яшәгән, соңгы вакытта дөнья буйлап сәяхәт иткән. 3 атна элек ул үзе генә (Мария кияүдә, ире Алексей) Мексикага килә, бер гаиләдә яши, алар белән бик дуслаша. Шуңа күрә алар яшәгән Монтеррея шәһәреннән Рейнос шәһәренә китәргә җыенгач, яңа дуслары аның үзен генә җибәрми, чөнки моны куркыныч дип саныйлар, дип яза «Комсомольская правда».
Шуңа да дуслары аны озатырга алына. Бу төбәкләрне картельләр (наркотиклар сату белән көн күргән бандитлар) контрольдә тота.
«Бөтен гаиләбез белән машинага утырдык: мин, әти, 9 яшьлек энем. Без шәһәргә кичке 10нарга барып җиттек, анда пост бар, безне алга таба уздырмадылар – янәсе, бик соң инде. Ләкин көтмәгәндә йөк машинасында ниндидер кешеләр килеп чыкты. Безнең машинада бала бар, ә алар корал алып безгә төбәделәр», – дип сөйләгән урлауның шаһиты булган Бренда.
Соңыннан коралланган кешеләр барысына да машинадан чыгарга, ә Машага «аларның» җиреннән йөргән өчен түләргә куша. Аның үзе белән бандитлар сораган кадәр кадәр акчасы булмый. Шуңа аны һәм машинаны алып китәләр.
Мария Ригович социаль челтәрдә үз блогын алып барган. Соңгы 2 язмасы куркыныч: «Безнең арттан картельдәгеләр куа». Догада булыгыз», – дип язган ул әсирлеккә алынганга кадәрге минутлары турында.
Фото: © Мария Риговичның социаль челтәреннән / "Комсомольская правда" сайты.
Ә соңыннан аудиоязма: «Дуслар, мин моны, әгәр үлә калсам, дип яздырам. Зинһар, безнең өчен догада булыгыз, мин барыгызны да бик яратам. Безне үтерерләр инде. Бу – төгәл түгел, әмма шанс бик аз. Кыскасы, без килеп каптык...» – дигән Мария.
Язмыш көлүеме, 7 мартта әле Рейноска барырга планлаштырган гына вакытта, Мария үз блогына түбәндәге сүзләрне язып куйган була:
«Мине Мексика буйлап ялгыз автостоп көтә. Иртәгә үк. Бер дә теләмим. Әмма барысы да тиз бетәргә тиеш. Әгәр мине әсирлеккә алып китмәсәләр инде. Хи-хи, мин бик нервлы».
Димәк, Мария үзе белән булган хәлне юрап китергән булып чыга инде.
Хәзер Марияне гаиләсе һәм туганнары коткарырга тырыша.
Фото: © Мария Риговичның социаль челтәреннән / «Комсомольская правда» сайты.
«Мин хәзер башка илдә, Маша Мексикада миннән башка гына сәяхәт итте. Испанча сөйләшүче дусларыбыз, шалтыратып, полициягә гариза бирде. Шулай ук мин Россия илчелегенең электрон почтасына хат та җибәрдем, алар исә үз якларыннан ниндидер җирле органнарга гариза биргән», – дип сөйләгән Машаның ире Алексей.
Бандитлар Мария өчен 1500 доллар акча сораган. Маша, бөтенләй элемтәгә чыкмый башлаганчы, бу хакта мессенджерлар аша иренә хәбәр итәргә өлгергән. Кирәкле сумманың өчтән бере хәзер аның счетында инде, дуслары җитмәгән өлешен җыюны игълан итәргә җыена. Әмма акчаны кемгә һәм ничек тапшырасы, ә бу – Мариянең иминлеген, аны иреккә җибәрүне ышандыра аламы – монысы әлегә билгесез.
