Җырчы Иркә соңгы елларда иҗатны һәм шәхси тормышын берүзенә генә тартып баруы никадәр кыен бирелгәнлеге турында сөйләгән. Җырчының тормыш иптәше Артур 2 ел махсус операциядә булды. Ул анда хәрби операция башлану белән үк мобилизацияләнеп, беренчеләр рәтендә киткән иде.
«Сүз фото турында түгел, башкада. (Иркә әлеге постка яңа фотосын да куйган.)
Соңгы еллар безнең гаилә өчен дә, иҗатым өчен дә җиңел бирелмәде. Тик мин балаларны да, еш авырган әниемне дә, сугышта 2 ел булган балаларымның әтисен дә, төркемемне дә, бөтен көчемне, вакытымны биреп, аларга терәк булырга тырышып алып бардым.
Дөрес әйтә гади тамашачым, «үз башына төшмәгән аңламый» дип. Эшемне, иҗатымны ничек булса да алып барырга тырыштым. Үз көчем белән. Алгарак киткән саен аякларыма сугып торучылар булса да, дәшмичә, тырыштым, эшләдем. Иҗатыма кайчак вакыт аз калды, чөнки бөтен йөк миндә булды.
Бу – зарланумы? Юк! Инде барысы да әкрен генә җайланып килә, гәрчә, югалтулар аз булмаса да…
Хәзер балаларым да әтиләре белән бәхетле булып яшиләр, мин дә планнарымны үтәрмен, Аллаһы боерса. Кайбер моментлар белән шулай уртаклашырмын», – дип сүз биргән җырчы.
Иркә шушы көннәрдә генә артыннан күзәтеп йөрүчеләр булуы турында да сөйләгән иде, ул аларга мөрәҗәгать белән чыкты.
