Шереметьевода ут капкан самолетта пассажирларның үлеме сәбәбе билгеле

Шереметьевода ут капкан самолетта пассажирларның үлеме сәбәбе билгеле
Быел 5 майда Шереметьево аэропортына утырган вакытта яна башлаган SSJ-100 самолетында 41 кеше һәлак булган иде. Алар ялкыннан, яну продуктлары белән агуланудан үлгән. Бу турыда Россия Тикшерү комитетының криминалистика бүлеге башлыгы Зигмунд Ложис "Коммерсант" газетасына интервьюда сөйләгән. 

Белгеч сүзләренчә, барысы да бик тиз арада килеп чыккан. Пассажирларның күбесе урыныннан тору өчен, иминлек каешын да ычкындырырга өлгермәгән. 
 

"Башлангыч мәгълүматлар буенча, агулы матдәләр ягулык янганда гына түгел, ә салонның пластиктан эшләнгән тышчасы янганда да бүленеп чыккан", - дип сөйләгән Ложис. 

Фаҗига килеп чыккан лайнер Мәскәүдән Мурманск шәһәренә барырга тиеш була. Ләкин ул очып киткәннән соң ук аэропортка кире әйләнеп кайта. Утырган вакытта, лайнерга ут каба. Самолетта 78 кеше була, шуларның 41е үлә. 

  • Шереметьево аэропортына төшкәндә очкычта янгын чыккан - видео  

Октябрь башында тикшерү гаепле кешене атады. Тикшерүчеләр пассажирлар үлемендә самолет командиры гаепле дип исәпли. Шереметьевога әйләнеп кайткач, пилот самолетны бик каты итеп утырткан дип фаразлыйлар. Ул кагыйдәләрне бозган, аның гамәлләре аркасында самолет җимерелгән һәм яна башлаган. Бу турыда «МК» сайты язды.