Буа районында трактор күпердән суга төшеп киткән мизгел видеога эләккән
11 мартта Кыят авылы янында Зөя елгасы аша салынган күпердә фаҗига булды.
Татарстанның Буа районындагы Кыят авылы янында Зөя елгасы аша салынган күперне су баскан. Шушы күпердән чыгып барганда трактор суга төшеп киткән. Бу хәлне шаһитлар видеога төшереп алган.
Видео кадрларыннан күренгәнчә, трактор су баскан күпер аша чыкмакчы була. Бу вакытта аның эчендә трактор йөртүче, тагын берничә кеше була. Бер мизгелдә тракторны агым алып китә башлый һәм ул елгага төшеп китә. Бу хәлне елга буендагы дистәләп кеше күзәтеп тора.
«Татар-информ» агентлыгына шаһитлар сөйләгәнчә, трактор йөртүченең кызы аварияне күреп тора. Ул әтисенең йөзеп чыкканын күрми. Шаһитларның берсе аңа әтисенең судан чыга алуын әйтә. Аннары бу хатын әтисен машинасына утырта һәм өйгә алып кайтып китә.
Фаҗига вакытында трактор эчендә өч кеше була. Трактор йөртүчесе, тагын бер пассажир судан йөзеп чыга. Өченче кешене әлегә таба алмаганнар.
