Төркиядә акча урлауда гаепләнүче Башкортстан хатынының язмышы билгеле булды
Ике баласы һәм ире белән ял итәргә килгән хатынны башка туристның акчасын урлауда гаеплиләр.
Төркиягә ял итәргә баргач, урлауда шикләнеп тоткарланган 27 яшьлек Алия М. Россиягә кайта. Ул Башкортстанның Октябрьск шәһәрендә яши. Бу турыда «Башинформ» хәбәр итте.
Алия ире һәм ике нәни баласы белән Анталиягә ял итәргә килә. 13 сентябрьдә Уфага кайтырга тиеш була. Кайтырга ике көн калгач, аны урлауда шикләнеп тоткарлыйлар һәм илдән чыгуны тыялар.
Алия гаебен кире кага. Страховка буенча алар адвокат яллый һәм аларга юридик хезмәт күрсәтәләр.
- Башкортстан хатыны Төркиядән кайта алмый: Ике бала анасы акча урлауда гаепләнә, дип язган идек.
Әлеге вакыйганы белгәч, Башкортстан Башлыгы Радий Хәбиров та ярдәм итә.
«Ниһаять, яхшы хәбәр язам. Мин өйгә кайтып киләм. Радий Фәритович Хәбировка зур рәхмәт. Әлегә мәсьәлә хәл ителеп бетмәгән, әле тикшерү бара. Ләкин видеолар булуына, анда минем гаепсез булуым күренүенә өметләнәм. Шуңа күрә миннән башка ачыклап бетерерләр», — дип яза Алия социаль челтәрләрдә.