Илсөя Бәдретдинова йортындагы бүлмәләрне күрсәтте һәм кияүгә чыгарга әзер булуын әйтте

Илсөя Бәдретдинова социаль челтәрдә халыкның сорауларына җавап бирүен дәвам итә. Җырчы хәзер үз йорты белән яши, ара-тирә аның йорт эче видеоларда күренгәли. Тамашачылары йортның эчен күрсәтүен сорый.

«Сезнең зәвыгыгыз шәп, минимализмдыр өегездә», – дип язучыга: «Бер артык әйбер юк. Барысы да гади», – дип язган ул, кунак бүлмәсен күрсәтеп. Җырчы алдан улының бүлмәсен дә күрсәткән иде.

«Өегез матур. Бәхет китерсен! Әзер йорт алдыгызмы яки ремонтны үзегез ясадыгызмы?» – дип сораучы өчен ванна бүлмәсе фотосын куйган җырчы. 

Җырчы коры кирпеч стеналы йорт сатып алуы, анда елдан артык ремонт баруы һәм дизайнер белән эшләве турында әйткән. 

Җырчы агач утыртуы турында кайчандыр хәбәр иткән иде, хәзер йорты да бар инде. Димәк, ул кияүгә дә чыгарга әзер. Бу хакта җырчы «бик лаеклы кеше очраса чыгар идем» дип әйткән.