«Ифтар түгел бу, шайтан туе» – халык блогерлар уздырган ифтар ашын нигә тәнкыйтьләгән?

Чаллыда яшәүче популяр блогерлар Чулпан һәм Илмир Гыйниятуллиннар 85 блогерны ифтар ашына җыйган. Аш мәҗлесе Чистайдагы «Хузур» кафесында узган. Бу – авариягә эләгеп һәлак булган блогер Лилия Гафурованың кафесы. Аның белән хәзер Лилиянең әнисе Фәридә апа җитәкчелек итә.

Ифтарда Энҗе Нармаева, «Кенсюха» буларак танылган Алия, Ләйсән Хәмәтдинова, Энҗе Фәтхиева, «Мама Маликушки», Гүзәл Хөснетдинова, Валерия Вәлиева, Резеда Миңнегулова, Альбинуш-инстатарка, Илүзә Галиәхмәтова, Равил Закиров, Эльвина Сибагатова кебек популяр блогерларны күрергә була. Бәйрәмгә җырчы Ришат Төхвәтуллин белән Алия Карачуринаны да чакырганнар, тик, Азнакайда концертлары булу сәбәпле, авыз ачуга Ришат килә алмаган.

Башта хәзрәт вәгазьләре, Коръән уку, авыз ачу белән башланган мәҗлес, соңрак блогерлар җыенына әверелгән. Бәйрәмне алып барырга тамада чакырганнар, кунаклар җырлап-биеп, төрле «кыю» уеннар уйнап, күңел ачкан.

Бәйрәмнән кызыклы фото-видеоларны блогерлар үзләренең сәхифәләренә куеп барды.

Алия Карачурина бәйрәмдә Хәния Фәрхи репертуарыннан «Авыл киче» җырын башкара:

Ир-атлар арасында мускуллары белән мактанып мода күрсәтү бәйгесе бара:

Блогерлар арасында бию буенча батлл – лезгинка биюче Резеда Миңнегулова барысын да уздыра:

Бәйрәмнең алып баручысы җырлый:

«Кенсюха» бәйрәмнең алып баручысына кушылып җырлый:

«Рамазан» дигән язуы әйләнеп торучы, үзенчәлекле бәйрәм торты:

Үзләре әйтүенчә, дини мәҗлескә изге ният белән җыелсалар да, әлеге ифтар блогерларның карап баручылары тарафыннан кискен тәнкыйтькә тап булган. Ифтар ашының җыр-биюле музыкаль бәйрәмгә әверелүен, кайбер кунакларның бәйрәмгә тиешенчә киенмәвен, ә кайберләренең дини өлеше тәмамлану белән үк яулыкларын салып атуын бик күпләр кабул итә алмаган. Бу хакта блогерларның үзләренә дә язганнар.

Берничә блогер язылучыларының тәнкыйть сүзләренә җавап кайтарды.

«Өйрәтүләрегез белән сез кешеләрне читкә этәрәсез. Сезнең кебекләр аркасында башкалар намаз укый башларга курка. Әгәр дә мине гел шулай өйрәтеп торсалар, мин беркайчан да намазга басмас һәм мондый ифтарлар уздырмас идем. Бу – һәр кешегә үз вакыты белән килә торган әйбер. Сезнең өйрәтүләрдән беркемгә дә яхшы түгел. Якыннарыгыз, туганнарыгызны аптыратмагыз андый киңәшләрегез белән», – дип язган хейтерларына Чулпан Гыйниятуллина.

Ләйсән Хәмәтдинова үз фикерен видео итеп яздырган.

«Кичәге бәйрәм буенча директка күп хатлар килде. Бөтен блогерның шундый ажиотаж булгандыр. «Мондый ифтар буламыни, шәйтан туе, показуха», «Блогерлар төшерер өчен генә барганнар», – дип язасыз… Мин күбесен җавапсыз калдырдым. Укыдым да игътибар бирмәскә булдым. «Показуха» дигәнегез дә «шәйтан туе» дигәнегез дә – сезнең фикер. Никах туйларына барабыз бит, дуслар. Анда да башта Коръән укыла да, аннары җыр-биюләр башлана. Кунаклар шулай ук яулык-түбәтәйләрдән утыралар.

Бу ифтарда да мулла башта вәгазь, аннары Коръән укыды. Мин бу өлешен төшермәдем дә хәтта, шулхәтле бирелеп тыңлап утырдым. Мәҗлес Фәридә апаның ресторанында узды. Барлык ризыклары тәмле, официант егет-кызлар тыз- быз чабып кына йөриләр. Мин Чулпан белән Илмирга чиксез рәхмәтлемен шундый матур бәйрәм оештырганнары өчен. Матур итеп күрешүнең нинди зыяны бар?» – дигән блогер.

Үзе анда булмаса да, инде күптән дин кануннары буенча яшәүче блогер Рафилә Шәмсетдинованы да язылучылары сорауларга күмгән. Ул да сторисларында үз фикерен белдерде.

«Җырлы, музыкалы ифтар мәҗлесе турында фикеремне сорыйсыз. Мин кичә әлеге мәҗлесне берничә блогер сторисыннан күрдем һәм дөресен әйтәм – мин сөендем. Чөнки бер тапкыр да яулыктан күрмәгән, үзем карап барган блогерларны мин яулыктан күрдем. Уразага кереп, яулык ябып, ифтарга дип килеп утырганнар. Һәркем дингә төрлечә килә. Кеше дингә башы-аягы белән кереп чума алмый. Кемдер нәкъ менә шундый мәҗлесләр аша килә.

Анда музыка булу сәбәпле, мәҗлесне оештыручыларны гаепләүчеләр бар. Мин бу урында болай дип әйтер идем – «минусларына» караганда, бу ифтарның «плюсләре» күбрәк. Шушы блогерларның ифтарга дигән ният белән җыелулары, анда аятьләр укылу, вәгазьләр сөйләнү – бик әйбәт. Гаеп эзләгәнче, «плюсләрен» табарга кирәк. һәм шәхсән үзем, бу чараның булуы булмауга караганда яхшырак дип саныйм», – дигән Рафилә.