Ибраһим хәзрәтне үтергән кеше, махсус операциягә китү сәбәпле, иреккә чыгарылган булган

Узган якшәмбедә, 21 апрельдә, Ульяновск өлкәсенең Илюшкина елгасында Ибраһим хәзрәт Исәнәевның мәете табылды. Урта Әләзән авылы хәзрәте Саратов өлкәсендә үтерелгән, ә аннары мәетне күрше төбәккә алып килеп, елгага ташлаганнар.

Хәзрәтнең янган автомобилен авылдан шактый еракта – Междуречье авылы янында тапканнар. 5 көннән соң, Павловка авылы янындагы елгада Ибраһим хәзрәтнең мәете табыла. Аны йөрәгенә пычак кадап үтергәннәр.

• Ибраһим хәзрәтне акча өчен үтергәннәр, өч баласы ятим калган

Үтерүче дип саналган Рамил Хәйров моңа кадәр дә хөкем ителгән булган. Ул аеруча авыр җинаятьләр, шул исәптән үтерү өчен, 10 елдан артык төрмәдә утырырга тиеш була. Ул элек тә корбанының машинасын яндырган. Бу юлы да Ибраһим хәзрәтнең машинасына ут төрткән.

Рамил Хәйров ирегеннән мәхрүм итү урыныннан махсус хәрби операция зонасына киткән. Кайнар нокталарда хезмәт иткәннән соң, бу ир-ат иреккә чыккан. Шуннан соң ул Ульяновск өлкәсенең Павловск районы Муратовка авылында яшәгән.

Ибраһим хәзрәт Исәнәев 16 апрельдә югала. 45 яшьлек хәзрәт, мал сатып алырга дип, 300-400 мең сум акча белән, «Газель» автомобилендә Саратов, Ульяновск якларына чыгып киткән. Аның белән Рамил Хәйров та булган.

Рамил Хәйров Ибраһим Исәнәевка арзанрак бәягә терлек сата торган урынны күрсәтергә ышандырган. Моның өчен зур суммада акча кирәк булуын әйткән. Ибраһим хәзрәт бу акчаны таба: үз акчасын ала һәм бурычка юнәтә.

Ибраһим хәзрәт, шикләнеп, үзе белән машинада барган Рамилне фотога да төшереп җибәргән. Соңрак, җинаятьтә шикләнелүчене шушы фото буенча эзли башлыйлар.

Рамил Хәйровны Украина чигендә тотканнар. Ул полиция хезмәткәрләренә мәетне буага ташлавы турында сөйләгән. Үтерүче корбанын 16 апрельдән 17 апрельгә каршы төндә, ягъни үтерүдән соң ук суда яшермәкче булган.

Пенза өлкәсендәге Урта Әләзән авылы мөәзине Ибраһим Исәнәевне җирләргә меңләгән кеше килгән, дип язган идек.

• «Иң авыры – мөселманның мөселманга кул күтәрүе»: Ибраһим хәзрәт туган авылында җирләнде