Җырчы Гөлсирин Абдуллина усал телле хейтерлары булуын һәрдаим искә төшереп тора. Алар аның йөз-кыяфәтенә дә, тавышына да бәйләнеп аптыраталар. Бу көннәрдә Гөлсирин тормыш иптәше Азат Абитов белән яңа фотосессия ясаган иде. Бу юлы хейтерлары җырчының яңа образын шәрехләү белән беррәттән, җырчының шәхси мөнәсәбәтләренә дә кагылып узган. Бер усалы, Гөлсиринне ошатмыйча: «Син Азатка пар түгел», – дип язып калдырган.
Әле ярый Гөлсирин мондый авыр сүзләргә үпкәләми, барысына да юмор белән карый. Алай да, ул бу комментарий иясен үзенең сторисларында күрсәтте. «Менә сиңа мә! Күптән парлашкан шул инде без», – дип җавап яза бу хейтерына Гөлсирин Абдуллина.
Моңа кадәр Гөлсирин хейтерларының тормыш иптәшенә хатлар язуы хакында да сөйләгән иде. Алар Азатка Гөлсиринне җырларга өйрәтергә куша һәм тышкы кыяфәтенә күбрәк игътибар бирергә өнди.
