Яшь һәм бик эмоциональ җырчы Гөлназ Асаева төнге 12 сәгатьтә үзенә бик тә авыр булуын социаль челтәрдә язды.
«Елыйсыларым килә. Нигә симерергә генә торам икән? Ачтан үләм, ничек суыткычтагы солянканы ашамыйча түзәргә?» – дип яза ул.
2021 елда Гөлназ кисәк кенә 10 килограммга ябыккан иде. Аның бу халәтен тамашачысы тәнкыйть белән кабул итте.
«Бу ябыгу сиңа килешми, элеккеге Гөлназ бик матур, бик чибәр иде. Үзеңнең табигый матурлыгыңны бозасың, нигә кирәк булды авыз кабартулар?! Нигә кирәгеннән артык ябыгып, скелетка калып йөрүләр?! Бөтен кешедән аерылып, янып торган матурлыгыңны харап итмә!»;
«И-и-и үскәнем, иренең белән күзен генә утырып калган бит»;
«Матур булам дип ямьсезләнгәнсең, кызым, иренең бигрәк килешми»;
«Ябыккач, бик ямьсезләнгәнсез. Ачуланмагыз – дөресе шул. Син ябыкканчы матур идең. Ә хәзер – коточкыч»;
«Авызыңнымы яки иренеңнеме ник зурайттың»;
«Күзләрең тонган, бөтен матурлыгың югалган», – дигән сүзләр язганнар иде аңа ул чакта.