Җырчы, «Ямьле» төркеменең элекке солисты Гөлназ Батталова бүген чит илдә, төгәлрәк әйткәндә – Америкада яшәп ята. Сөйгән яры – чит ил кешесе Алекс.
Гөлназның инде күптән кияүгә чыгуы билгеле. Бу хакта ул үзе быел март аенда ук хәбәр иткән иде. «Үземнең кәләш икәнлегемне сезгә күптән сөйлисем килгән иде. Ә хәзер мин — хатын. 11.03.2022», — дип сөйләгән иде Гөлназ сторисларында. Ул вакытта, күрәсең, яшьләр мөнәсәбәтләрен тыйнак кына итеп рәсмиләштергәннәр. Ә хәзер купшы итеп, туй күлмәкләре киеп, кунаклар җыеп, бәйрәм итәләр булса кирәк.
Гомумән, элегрәк Гөлназ шәхси тормышын социаль челтәрләрдә күрсәтмәгән булса, хәзер, киресенчә, ул бәхетле мизгелләре белән даими уртаклашып тора. Бу юлы Гөлназ виртуаль дусларына туй күлмәге сайлавын күрсәткән һәм туйлары февральдә булачагын хәбәр иткән.
«Туй күлмәге... Туй күлмәге киеп карау миндә сүз белән әйтеп бетергесез эмоцияләр уятты. Көзгедән үземне «кәләш» образында күргәч, һич көтмәгәндә елап җибәрдем. Хәер, мин моны башкаларга күрсәтмәскә тырыштым. Шул көнне кичкә кадәр ниндидер хис-кичерешләр белән, күңелем тулып йөрдем.
Бик дулкынландыргыч булды бу. Күлмәк сайланды! Безнең туебыз Лос-Анджелеста февраль аенда булачак.
Сүз уңаеннан, мин сайлаган күлмәк бу видеода юк», – дип язган Гөлназ.
«Сез, ак күлмәк кигәч, аеруча да матур», «Лос Анджелесның иң матур кәләше!», «Аккош сыман», «Шәп, котлыйбыз!», – дип, җылы комментарийлар калдырганнар Гөлназның виртуаль дуслары.
«Әти-әниләрегез киләчәкме соң?» – дип кызыксынучы да булган. «Тырышачаклар», – дип җавап биргән җырчы.
- Җырчы Гөлназ Батталова сөйгәнен күрсәтте
- Гөлназ Батталова, «Ямьле»дән китеп, икенче төркем оештыра: «Китүемә бер тамчы да үкенмим!»
Видео: Гөлназ Батталованың социаль челтәрдәге аккаунтыннан